Las resèrvas de l’arca de Noè

Èra pas lo tot pel brave Noè de recampar las bèstias sus son arca. Lo temps del viatge, las caldriá noirir e apasturar e dins la còlha i aviá de talents contradictòrias. Faire la tièra de çò necessari per l’expedicion biblica prenguèt temps al profèta. A quauques mètres del quasernet ja trapat suls penjals d’Alaric, trapèrem tanben las nòtas del patriarca per anar faire las crompas suls mercats de la contrada. Mercé a l’IU (nòstra Intelligéncia Umana), sèm arribats a reconstituir la tièra de sas comandas e de sas nòtas suls multiples regimes alimentaris, en ensajant d’esvitar los escanagats.

Las crompas del capitani de l’arca

Per capitar lo viatge, lo Noè aviá notat:

– Carabassa e bruma bassa per l’agaça.

– Aiga de la piala per l’anguiala.

– L’anhèl lepa lo pòt de mèl.

– Brandada per l’arencada.

– Porret per l’aret.

– Farda per las arnas.

– Aseròlas per l’ase.

– Tot al pairòl per l’auriòl.

– Codolets pel bacalhau.

– Chichomèia per la baudròia.

– Caulet-flor pel bèca-flor.

– Figas pel bècafiga.

– Figas per la bediga.

– Rebarba per la cabra.

– Paquets de cigarretas pel camèl.

– Bajanat pel capbernat.

– Dentilhas per la cardonilha.

– Castanhas per la castanhòla.

– Bonhetas per la catarineta.

– Cantal pel caval.

– Aranhas pel cèrcaranhas.

– Chicorèia per la chichorla.

– Colombre per la colòbra.

– Cafè de Colombia pels colombs.

– Lo corbàs es plan empantenat amb lo formatge al bèc.

– Ceses becuts pel cocut.

– L’aperitiu pel cotoliu.

– Lenga de buòu pel delargabuòu.

– Colibiac pel drac.

– Lo dromadari manja coma un patarin.

– Bledaraba per l’escarabat.

– Un panièr de campairòls per l’esquiròl.

– Pebrina per la faïna.

– Mendilhs pel faucilh.

– Bleda per la feda.

– Bolhon de legums pel gorgolhon.

– Las galinas crucan pralinas.

– Pas d’erbolat pel gat.

– Rafes per la girafa.

– Una toma d’edam per l’ipopotam.

– Pomas de pin pinhièr pel lapin.

– Genèbre per la lèbre.

– Escaravic e salsefic pel lombric.

– Ausèrda per la lusèrna.

– Lo lop fa grasilhar costelons d’anhelons.

– Mongetas per la mongeta.

– Pastagàs e digestius per la monina.

– Torin pel pimparrin.

– Parpèlas d’agaça per la pipistrèla.

– Unas caçòlas de caçolet per la còla dels polets.

– Cauleton pel poleton.

– De plan bon vin pel polin.

– Sant Onorat pel pregadieu.

– Lo rinoceròs tòca pas la carn que tòca l’òs.

– Segal pel rigal.

– Ris (de Marselheta) pel rit.

– Sau d’Aigas-Mòrtas per la sauma.

– Sau de Grussan pel saumon.

– Garbura pel silur.

– Ris tai e calissons pel taisson.

– Sopa de bren per la talabrena.

– Gaperon pel tamaron.

– Patanas e bananas per las tartanas.

– Un pairòl de farnat pel tesson.

– Macarons pels tirons.

– Pomas de docha per la trocha.

– Salicòrn per l’unicòrn.

– Fuèlhas d’arbre pel zèbre.

E lo Noë de qué manjava ? Mistèri…

Chapaire Roch