55 ans de batèsta, « femna d’òc as drech a la paraula »

60 ans de consciéncia, « droit des peuples à disposer d’eux-mêmes »,

amb aquò me siái bastida,

per aquò me siái batuda.

E ara ?

Ara, un president de la Republica qu’entend luchar contra los separatismes, que se referís a Villers-Cotterêts (discors dau 4 de setembre).

Fracàs, quincanèla, personaus benlèu, mas mai largs, ailàs !

Jamai aviam pas agut tant de dení, tant de volontat d’impausar una « nacion », produch de manipòlis istorics, de colusion amb una Glèisa. « Sabre et goupillon ».

Pasmens aviam agut ipocrisia, ignorància, falsetat. Sufisiá pas ?

Una òsca de mai es passada.

Escriguèron, an escrich, los trobadors, de l’opression das uns, de la traïson das autres e das nòstres tanben.

Escrivon, parlan, cantan òmes  e femnas, despuòi de sègles, per nos faire entendre, reconóisser, respectar.

Les séparatismes attentent à la Nation…

… sont ennemis de la République…

… la langue de la République est le français…

Lo monde se radicaliza dins la mesa a plat, la mesa au pas de la diversitat de las populacions.

Lo rus impausat dins totes los territòris annexats. L’arab impausat dins los païses musulmans. Lo mandarin impausat as Mongòls…

Parlatz una autra lenga ? Circulatz, i a res de discutir.

Pretendètz èsser au monde, dins lo monde, amb vòstra cultura pròpria ? Circulatz, la lei dau monde es lo neòliberalisme, la sola règla es lo profièch.

E per lo profièch mai grand de quauques uns, cau de populacions adomengidas, formatadas, cap-clin.

Lenga ? La de l’argent.

Cultura ? La de la pensada unica e dominanta.

Identitat ? La d’una carta nacionala, la vouguèssetz o pas.

Umanitat ?… Qu’es aquò ? Qu’es aquò ?

                        4 membres

                        1 tèsta

                        de budèus…

E ara ?

Se renegar pas. Contunhar coma se res non èra, ni per ne patir de n’aver consciéncia.

PS : « En Chine, les Mongols se révoltent pour défendre leur langue » , títol de Médiapart lo 4 de setembre.

Lo govèrn chinés demesís drasticament l’usatge de la lenga mongòla dins los ensenhaments au profièch dau mandarin.