Longa vita tà noste Enric navèth!

D’unis pensavan que lo Bayrou podiá crentar dins gaire de temps una mocion de censura. Finaudèl, en utilizant sabi pas qunis artificis constitucionals, lo bearnés a capitat de se faire votar los plens poders! L’ora del revenge a enfins sonat! 

Aprèp aver reglat las questions de modificacion del funèste article 2, de la ratificacion de la Carta europèa e del refús de l’article 30 de la Convencion internacionala dels dreits de l’enfant,

aprèp aver oficializat la reconeissença d’utilizar las lengas autoctònas dins las deliberacions de las amassadas territorialas,

aprèp aver nomenat lo David Grosclaude a la presidéncia de la cadena novèla dels Païses de França,

aprèp aver transformat lo Ministèri de la Cultura en Ministèri de las Culturas,

a multiplicat los arrestats necessaris per un capvirament efectiu de la politica linguistica de França.

A refusat çaquelà que lo país se nommèsse Republica de França e de Navarra que las inicialas RFN aurián semenat la confusion e fait publicitat per l’extrèma-dreita.

Los arrestats de Matinhon

A vos de jutjar sus pèça en espepissant los primièrs arrestats preses a Matinhon pel Supèr-primièr ministre:

– Sus las armas de França, las vacas biarnesas remplaçaràn lo pol.

– Cada fogal de França serà dins l’obligacion (liurament admesa) de manjar una garbura lo dimenge a miègjorn. Eventualament, las personas al regime o del tresen atge poiràn remplaçar la garbura per una galina d’Astarac al topin.

– Lo bearnés vendrà la fòrma de referéncia e de plen usatge de la lenga occitana.

– Las estatuas de Frederic Mistral deuràn èsser remplaçadas dins los delais los mai brèus per estatuas de Xavièr Navarròt

– Imne nacional: Remplaçament immediat de La Marseillaise (amai se d’unes bruches de corredors agen anonciat la causida de L’immortèla o de L’Encantada, mas es pas Nadau cada jorn) per Bèth cèu de Pau

– Las avengudas e baloards principals de las vilas e las carrièras grandas del vi-latges deuràn prene dins un delai maximom de 1600 jorns lo nom d’Enric IV.

– Fusion liurament negociada del Congrès Permanent de la Lenga Occitana e de l’Acadèmia Occitana.

– Signatura d’un pacte de non-agression, sens preséncia necessària dels cascos blaus de l’ONU, entre los tenents de la chocolatina e los partesans del pan de chocolat.

– Los libres de contes de Charles Perrault seràn retirats sistematicament de las bibliotècas e mediatècas municipalas, departamentalas, regionalas e universitàrias per èsser remplaçats pels libres de contes de Joan-Francés Blader e d’Andrieu Lagarda.

– Sus las ondas de Ràdio-País e de Tele-País (canal dobèrt tre lo 12 de genièr de 2025), l’emission setmanièra d’un quart d’oret en francimand serà suprimida en temps de : Carnaval biarnés, partida a domicili de la Seccion palesa, passatge del Torn de França dins Pirenèus, lo jorn de Candelosa per pas destorbar lo revelh dels orses, per Nadal, per Pascas, pels 1èr e 8 de mai, pel 14 de julhet, los jorns de programacions artisticas cò d’Hestiv’Òc e per tota rason, seriosa o pas, que justificarà (o pas) la non-difusion.

– Lo 14 de julh se dirà pas mai Fèsta nacionala mas Fèsta de la Federacion

– L’arribada del Torn de França se farà pas mai sus la mai bèla avenguda del monde (parisenc), mas al pè del castèl de Pau.

– Participacion de las esquipas d’Occitania, de Catalunya e d’Euskadi al Tornèg de las IX Nacions.

– Cada an, lo/la ganhant/a del concors de cant de Siròs representarà oficialament França al concors de l’Eurovision e dobrirà la sason d’Hestiv’Òc.

– Las cavas de Matinhon (que lo Joan-Bernat Larriu ne serà nomenat director) s’emplenaràn de Juranson, Madiran e Pacherenc  .

– Intervencion renfortida alprèp del Vatican per provar que la Bernadeta de Sobirós èra pas bigordana mas biarnesa cap-e-tot!

– Pel temps de dormitòri dins las mairalas, las ATSEM seràn encargadas de canturlejar una version de Sòm, sòm, veni, veni d’endacòm…

– Los burèus de Matinhon seràn transferats a Bordèras.

– Lo cèu de Pau serà dins l’obligacion legala d’èsser bèth en tota sason.

– Tota persona suspresa a prononciar Bérou en ocultant la diftonga de la primièra sillaba serà estacada en plaça publica per cridar long de 3 oras totes los mots a diftonga de la lenga occitana (e, eventualament, d’autras lengas).

– Tota persona que portariá per rason oficiala o per escais lo nom de Ravalhac serà fòrabandida non solament de França mas tanplan de l’Union europèa.

Visca Che-Navarra!

Podèm que nos felicitar d’aquelas decisions sanitosas que van dins lo bon sens del respècte de la biodiversitat culturala e linguistica e que permetràn a França de se mostrar coma cap-davantièra e maire de las libertats linguisticas e culturalas…

Avèm pas agut de Che Guevara occitan, mas ara podèm cridar tot nòstre sosten a nòstre Che-Navarra, reincarnacion de nòstre bon rei Enric!

(Çaquelà, i a quicòm que me tafura: perqué aquel pichon nom contra-productiu de… Francés??????? coma prendre un cap de cabinet que se ditz Pernot es un bon signe -referéncia a Ricard-Còr de Lion?- mas aver per conselhièr especial un En Thiers…)

Vaironet Roch