Rintrada

Diga ! Ges de guinhadas dempuòi Nadal, n’i a que me faguèron passar per mòrt. Saique se son pensats que m’ère arrestat de beure, a de bon. Rai, coma son pas venguts a mon enterrament anarai pas au sieu, es ja un pauc de temps de ganhat que de s’esparnhar un còp de crotz. Mas non, siái plan viu, faguère pas solament un sindròme d’aganiment professional, regòbi dau trabalh, que lo mond dison ara : « lo burn out ». Aviái tot simplament d’autras padenas sus lo fuòc.

E uòi fau la rintrada coma un fum de mond. Pas d’a fons a l’americana, pasmens. Sabe pas s’avètz vist aquò dins la premsa, aquelas maires estatunencas que crompan unas placas parabalas per metre dins los cartabèls de sos drollets en cas d’ataca au fusilh d’assalt dins las escòlas ? Ja que la biaça d’esquina es puslèu de las pesugassas, imaginatz un pauc amb una placa de fonda o de titana au dintre lo pichotet se va deslogar las patèlas e levar los uòlhs au cèl sus lo camin de l’escòla. En mai, risca de s’embroncar a un fum de pipa o de marchar sus una sentinèla… E puòi caudriá augmentar l’allocacion escolara de rintrada que son pas donats aqueles cartables !

Vòls que te diga ? emai nos carpinhèssem de còps -tradicon occitana obliga- dins los cercles d’Erau, E…rau !!, de costuma l’ensenhament es mai tranquillon qu’a l’escoleta americana. Ges de kalachnikòv, tot bèl just lo trio de bolas Obut se l’estudiant se’n torna de la partida de petanca dau cada jorn. Es un pauc mens riscat.

Mas los americans me donèron una idèia de las famosas que serà lèu la sason dels campairòls e que los dau Pastagàs-Warriòrs son mai tornats a la caça per los bòsques. Me’n vau crompar un abrassac parabalas e ai ja demandat a Laulhère de m’estudiar una berreta en kevlar en cas de quicòm.

Enfin, es çò que ne dise ieu …

La guinhada de l’IEO34. E, rau !  

Vos agradèt aquela bilheta?

N’auretz aquí un pauc mai amb La Gèsta dau Montamametas. En venda dins totas las bonas librariás.