Peteta virtuala

Diga ! Hollywood es en revolucion ! Figuratz-vos qu’an engimbrada, mercé l’Intelligéncia artificiala, una actritz virtuala, numerizada de cap a cima que se ditz Tilly Norwood. E coma pròva de vida, ten-te-Maria qu’anam trotar, li an dobèrt un compte Instagram…. Coma dison a Seta : la barca tòca.

Mas dempuòi tot aquel mond dau cinèma que petan dins la seda an páur dau grand remplaçament e de pèrdre sas plaças de las bonas, evidentament.

Plan solide, emai degun me demandèsse pas res, curiós coma un pet a la prima, anère ieu espinchar çò que se passa aval e vene aquí metre ma pelha a la bugada. Aquela drolleta, vantada per èsser de las sèt beutats, mescla de Clàudia  Cardinale, Escarleta Johanson o Natalia Portman, que dison, la tròbe sens chuc ni muc, dessaborada coma o seriá una borrida sens alhòli. Las polidas occitanas an pas ges de laguis de se far.

Mas, segur, la question s’amerita d’èsser pausada : « Ara que sabèm pas pus d’onte venèm, ont anam ? ».

E coma per azard Bautesard, es una actritz qu’es creada primièr coma s’èra mai entrepachós de faire un mascle. Almens que siaga per servir un còp de mai los fantasmes masculins ? Podèm remarcar tanben que tant que l’IA servissiá per remplaçar molonadas de figurants -nautres disèm puslèu prèstamorres, doblaires e pichons mestièrs ligats a la produccion cinematografica, los cataus olivodians se calavan e empochavan. Mas ara…

Rai, me dise ieu qu’es una actritz de mens que se farà paupejar dins los corredors dels estudios. Los filmes de deman seràn pas pus que de jòcs vidèos melhorats, escampa de mai se ne caliá una, per se despegar dels ecrans e s’anar passejar per lo campèstre.

Vòls que te diga ? A prepaus dau campèstre, me demande s’aquela tecnologia  novèla nos poiriá pas fornir quauques caçaires virtuals per espaurugar los singlars e los bandir luònh dels òrts e de las vinhas, carabinièrs ben mens dangieroses que los modèls de carn, de Ricard e d’òsses. E tant qu’a i èsser benlèu que poiriá fargar per França  un primièr ministre e un govèrn per se cambiar d’aquela politicalha de palhassas aparisenquits.

Enfin, es çò que ne dise ieu…

La guinhada de l’IEO34. E, rau !  

Vos agradèt aquela bilheta?

N’auretz aquí un pauc mai amb La Gèsta dau Montamametas. En venda dins totas las bonas librariás.