Li manca una vèsta…

Diga ! Los Enfants de la Bona -entendètz, la Republica, la sociala, la justa, la vertadièira- cars a l’Ives Roqueta e a tant d’autres, se devon revirar dins sa caissa d’aquesta passa. Qual se seriá imaginat qu’un president de la republica de França desgalhe mai de 3000,00€ d’argent public pas que per far viatjar sos costumes en avion en classa afar ? E coma los costumes èran acompanhats per lo vailet de pè dels Aliscamps, podètz multiplicar per dos. Sens comptar lo retorn que solide los an pas donats au pelharòt dau canton, los vestits. E dins aquel temps lo tipe s’enviava en l’èr dins l’avion presidencial qu’anava au meteis endrech, au Brasil per -ten-te Maria qu’anam trotar-  parlar d’ecologia e de nuclear !?…

Pasmens, podèm pas que nos regaudir e butar plan fòrt un « cacaracà ! », perdon un « cocorico ! » nacional. Lo president causiguèt Aire França per sa garda-rauba e non pas un avion a cost bas coma o fan los pesolhs revenguts que sètz quand se vòlon ofrir un pauc d’exotisme.

A desconat, Manu. S’èra simplament confondut e se pensava que « classa afar » èra justament reservada per far viatjar sos afars. Mas se los costumes èran sus aqueste vòl, quid dels malhòts de còs, caucetas e eslips presidencials ? Siaga aquel porcàs ne cambièt pas de tres jorns, siaga an viatjat sus un autre vòl, e benlèu, coma son fardas que tòcan als fondaments de la democracia, dins un avion privat ? Es pas de bon saupre amb aqueste mond que se refusan pas res amb nòstre argent.

Vòls que te diga ? En tot cas, sèm rassegurats. Quand vendrà au Cap d’Agde lo mes que ven per l’estrena de la sason naturista, los contribuables que sèm farem d’estauvis sus lo viatge de las pelhas presidencialas. Amb aquò, benlèu qu’òm li poiriá pagar una vèsta, una de las bèlas ? Non ?

Enfin, es çò que ne dise ieu…

La guinhada de l’IEO34. E, rau !  

Vos agradèt aquela bilheta?

N’auretz aquí un pauc mai amb La Gèsta dau Montamametas. En venda dins totas las bonas librariás.