Lo país dels Potonorses

Diga ! La patrolha ven de tornar passar davant la librariá. Son quatre, de la polícia rurala aqueste còp. Tres masclasses baleses e espatlutasses qu’aurián pas desparelhat la mesclanha dau grand Besièrs de las annadas setanta e una femnòta, linja e vistablament esportiva. Capejan per saludar sus lo trepador de l’autre man dau baloard los companhs de la municipala que davalan vèrs lo barri de la gara.

La gacha velha ! Siaguèsse tornat Montfòrt a las pòrtas de la vila que i auriá pas mai de rondas dins la ciutat. Mas, ailàs, fa bèl brieu que los francimands son dins la plaça…

E, poguèsson parlar los libres de la veirina, dins la lenga que son escriches solide ! que te dirián qu’es benlèu lo quinzen còp de la jornada que la gendarmalha lor passa la revista. La librariá de l’IEO es la mièlhs gardada de França. Ges de raubatòri ! Res de senhalar ! Las òbras mèstras de nòstra literatura pòdon dormir tranquillas, atanben lo Tresòr dóu Felibrige, tresaur vertadièr aqueste, non pas coma la verrotalha dau Louvre dos còps panada : au musèu parisenc recentament e un còp èra au pòble que paguèt lo prètz fòrt per lo baujum de quauques unes…

Vòls que te diga ? Me caliá montar en vila, a la pòsta, mandar un paqueton. Maldespièch ieu me trobère enquadrat per quatre o cinc d’aqueles robocòps dau sègle XXI, armats dusca a  las galhas. Èran benlèu d’agents de la securitat de la via publica o los de la milícia anticròta de chins a Nanard ? Sabe pas e o deve reconóisser umilament, ai de mal de los destriar. De tot biais, qual se sembla s’embessona ! Arribèrem davant l’ostal vièlh que lor servís ara de casèrnament, e lo capolièr de la còla, un barbut de las ussas enermassidas e dau clòsc rasclat, se sarrèt de la sentinèla per li faire los tres potons dau bonjorn. « Tè, me pensère, n’es un de la familha. » Mas non pas ! Tota la còla, femnas e òmes de se potonejar la sentinèla qu’un còp acabadas las efusions dobriguèt lo portanèl. E los autres de dintrar e de començar de se baisar tot lo brusquet.

Espantat ! I auriá un còr tras las giletas para-balas en kevlar ? Ven de picar lo temps dels peace and love en unifòrmes ?

E ben, fasètz-vos lo poton tant que volètz e nos fagatz pas pus la guèrra.

Enfin, es çò que ne dise ieu…

La guinhada de l’IEO34. E, rau !  

Vos agradèt aquela bilheta?

N’auretz aquí un pauc mai amb La Gèsta dau Montamametas. En venda dins totas las bonas librariás.