Penequet a l’ombra

Diga ! Me daissère dire que lo Trump -Alan diriá lo Trompeta- s’èra fach peçugar un còp de mai a faire lo penequet, setmana passada, en plena reünion. Es pas de dire lo bonaür que faguèt a sos amics democratas, aüroses coma nièiras sus un chin, qu’i veson signe de vielhitge e d’incapacitat a governar : « Vesètz-ben, Donald a escampada la gopilha, li manca ara un reng de teules, lo cal destituïr ! » L’autre fasiá çò mèmes, fa pas gaire, amb Biden.

Dins Erau, fa d’annadas, aguèrem un evesque antau. Pas pus lèu engolit lo dessèrt, lo Monsignore pesava l’òli -es antau que disèm aquí- per un desenat de minutas. Aqueles que lo conoissián ben disián qu’èra lo pes de l’aureòla que li fasiá antau picar dau nas dins l’escudèla quand s’aviava la sacro-santa digestion…

Dins lo cas de Trump, pense pas que l’encausa siaga aquò emai sos amics dau mond dau fotbòl -remarcables de servilitat- i agèsson remés recentament –santo subito !- lo primièr e escur prèmi de la Patz de la FIFA per faire perdonar l’escòrna dels Nobèls. Bon, o sabèm fa longtemps, son pas eles qu’inventèron las alumetas fosforicas.

De mai lo tipe n’es pas a son còp d’ensag que, lo mes passat, faguèt en public una dormida de las cranas.

Me pense ieu que lo cau daissar dormir lo mai possible, que dins aqueste temps ditz pas de colhonadas capablas de metre lo mond a fuòc e a sang. E, s’o cau, me pòrte volontari per i anar cantar lo « Sòm, sòm… »

Vòls que te diga ? Rai de las Americas. Nautres quand n’avèm un coma aquò, d’aqueles cataus, lo mandam dormir a l’ombra e lo Sarquò i passèt quauques nuòches lo mes passat. E ben, dormiguèt pas lo tipe ! Coma o faguèt lo Bellaud de la Bellaudièra en son temps mas amb ben mens de talent çaquelà, dau fons de sa preson escriguèt un libre qu’es ja ennaut las vendas dins França tota. E ara, se’n tòrna lisquet, fresquet coma las cuòissas d’una bugadièira amb un nivèl de popularitat espectaclós…

Me demande se caudriá pas embarrar los autors contemporanèus occitans per tapar lo deficit dels editors ?

Enfin, es çò que ne dise ieu…

La guinhada de l’IEO34. E, rau !  

Vos agradèt aquela bilheta?

N’auretz aquí un pauc mai amb La Gèsta dau Montamametas. En venda dins totas las bonas librariás.