Es con coma…

Diga ! Onte lo francés te dirà : « Aquel, es con coma una valisa ! », l’occitan apondrà « Non, non ! Es con coma cinquanta valisas ! » que, per nòstre pòble, Larguesa es pas mòrta. Emai, que nautres quicham totjorn la semau : « Es con coma cinquanta valisas sens manetas ! » Que, o cau reconóisser, una valisa ordinària a , a quicòm pròp, un QI coma lo tieu. Mas una valisa que sas manetas se faguèron la mala es quicòm mai. E 50, imaginatz un pauc, 2 còps mai de cons cons que l’equipa de França de fotbòl de 2010, aqueles que faguèron grèva…

 E ben, l’ora pica de despolsar aquelas vièlhas expressions que nos venon dau temps de ma grand la bòrnia quand aplanponhava sa valisa per préner lo tren a vapor – l’interès locau- per anar au Clapàs. Ara per ara que prenèm la veitura atomica, au sègle XXI,  vos caudrà dire :  « es con coma una Teslà ! ».

Figuratz-vos que la còla a l’Elòm Musk desoblidèron de metre de manetas a sas veituras naut de gamma. Pas exactament aquò. En fach engimbrèron de manetas escamotablas electricas sens pensar a las panas de corrent. E, çò que deviá arribar es arribat. Mai d’un còp. De paures mond rics se trapèron embarrats, cunhats dins sas veituras flames nòvas enflambadas, sens ne poder sortir, dins lo temps que los pompièrs los regardavan cremar.

Tan talament que l’Empèri dau solelh levant las ven d’interdire d’en cò sieu, las Teslàs, afavorizant per sos ciutadans la qualitat plan famosa dau « made in China ».

Vòls que te diga ? Ieu dise aquò sonque per rajovenir un pauc las expressions de nòstra lenga milenària que per çò de las veituras, pecaire ! La nòva a 250000 km, la vièlha -nos en cau doas que sèm a l’escart dels camins- la vièlha n’a 360000 de quilomètres. Es aquò l’ecologia vertadièira que m’ensenhèron a l’ostau, faire durar las causas e gardar sas manetas dau sègle passat. E au respècte dau vesin siái pas ieu qu’un gafet escrologista… Rotla el dins un traste de recuperacion, una ronha que tomba a flòcs, e las a remplaçadas las manetas desmargadas per de sandows. Son pas jamai en pana ! Benlèu que poiriá vendre lo brevet a l’Elòm ?

Enfin, es çò que ne dise ieu…

La guinhada de l’IEO34. E, rau !  

Vos agradèt aquela bilheta?

N’auretz aquí un pauc mai amb La Gèsta dau Montamametas. En venda dins totas las bonas librariás.