Lo Patèr dels ases

Diga ! I a un concèpte que m’aviá escapat fins ara e que descobrisse dins l’actualitat dolentosa d’aquestes darrièrs jorns. M’es un pauc coma lo Patèr dels ases que, o deve reconóisser plan umilament : coma ase siái nascut, per ase me siái logat e ase morirai.

Se tracha de çò que dison dins lo Drech Internacional  « la legitima defensa preventiva » evocada per los Estats Units d’Americas e Israël per justificar l’injustificable emai siaga a l’encontre d’autres capbordasses.

Macarèl ! es de plànher que l’agèsse pas sauput mai d’ora : aquò es quicòm la legitima defensa preventiva !

Ara per ara m’i vau metre… E aquò va caufar ! Aquel caçaire de Niana que me pense que me rauba mos cantons a campairòls, e ben, abans la sortida de las morilhas lo te vau anar veire  e i ficar un brave mostàs e un parelh de bofas preventivas. E aquel grand femnassièr de Peiròt, aquel sautabarralhas, que se poiriá que reluquèsse ma Polida dins sa rauba enflorida quand anarem votar dins quauques jorns, per el serà un brave emplastre e dos vira-e-vai-t’en ! E mon patron que risca de me faire un bescompte quand me prendrai la retirada, lo te vau metre lèu fach als Prud’òmes que sabèm pas jamai e avisarai sulpic mon sindicat de sas exaccions malonèstas, potencialas e futuras.

E podètz faire çò mèmes : portar lo planh contra los marselheses que venon de logar lo AireBNB d’a costat per rambalh nocturne eventual la nuòch  venenta o pausar un repotegal a cò de Dartí que lo lava-escudèla nòu que venes de crompar se  poiriá encalar d’una lavason l’autra…

Emai, sospechèsses ton vesin de fabricar de dinamita agricòla dins son cobèrt, pòdes anar quèrre tos amics Donald e Benjamin per li tombar dessús.

Que, per practicar la legitima defensa preventiva val melhor èsser lo mai fòrt…

Vòls que te diga ? Saique ne siái un, d’ase mas ne sabe que nos prenon per d’asenasses ! Nos enfumavan fa pas gaire amb sa « creissença negativa » per emplegar pas lo mot de recession, ara nos venon amb sa « legitima defensa preventiva » que a çò que me sembla poiriam sonar en occitan e sens oximòre, en un mot solet : « agarrida »..

Enfin, es çò que ne dise ieu…

La guinhada de l’IEO34. E, rau !  

Vos agradèt aquela bilheta?

N’auretz aquí un pauc mai amb La Gèsta dau Montamametas. En venda dins totas las bonas librariás.