Fa 40 ans, en 1984, Lo Moviment dau 11 d’Abriu das associacions occitanas inicièt a Montpelhièr la primièra accion cap a una collectivitat per una politica publica per l’occitan. Al cap de meses de butada energica capitèt de fa crear a la Region lo primièr budget e pòste de cargat de mission per l’occitan daus paises d’òc. Eveniment important puòi que, dins la nòstra societat, cap de lenga pòt pas viure sens una accion publica activa.

Cal rementar qu’en 84 la Region Lengadòc-Rossilhon èra a se cambiar en vertadièra collectivitat. Aviá pas encara coneguda d’eleccion e per aquò èra l’afar de «Grands Elegits » coma son president lo Robert Capdeville president dau departament d’Aude. La tota novèla decentralizacion (82 e 83) veniá de ne cambiar la governança que passava enfin dau prefècte aus elegits. Aquel « Moviment » foguèt istoric e fondator. Foguèt un exemple per las autras regions e permetèt d’espandir las accions culturalas e educativas. Se faguèt amb un sosten larg dins la societat : sindicats obrièrs (CFDT, CGT), agricòlas (MIVÒC, paisans e elevaires) e tanben de personalitats coma los liders viticultors Huillet e Ma!re-Baugé. E dins l’accion lo Robert Lafont, un dels paires de la regionalizacion. Se rementar es l’escasença de mesurar lo camin fach (o pas), es atau una ajuda per uèi.

La traduction de cette chronique sur Midilibre.fr