Encara un còp  anam pagar per Villers-Cotterêts.

 Òm  sap  que del temps del rei Francés Ier, lo ben nommat, un edicte lai foguèt  signat per impausar lo francés contra lo latin dins las papafards oficials. Mas aquò  se virèt puèi en manipòli contra las autras lengas de França, fins a lor eradicacion cridada jos la Revolucion per l’abat Gregòri.

 Fa pauques tempses nos tornèron faire lo meteis còp amb lo francés lenga de la Republica  auborat contra l’anglés envasissent, que nos valguèt assalts e nhòcas duscas a las pancartas de las vilas e als pichòts noms dels enfants.

O avèm pagat de milantas misèrias Mas ara anam pagar sens metafòra, dels nòstres sòuses. E car ! Lo budgèt de l’installacion de la Ciutat Internacionala  de la Lenga Francesa  ( perdon : de la Cité Internationale etc, etc..) dins lo quite castèl de Villers-Cotterêts, ne finís pas de montar : passat de 110 milions d’èuros a la debuta a 210 milions en 2020, deuriá pojar lèu a 250 milions segon los menaires del projècte  del Centre dels Monuments Nacionals, siá un creis de 30 %. La causa ne seriá d’aver trantalhat dins las causidas de l’acapçament e dins la fixacion de las datas de liurason. Plan segur los diches responsables se mandan e se remandan la responsabilitat de la fauta. Prevista per la velha de l’eleccion presidenciale de  2022,  foguèt remandada al mes de mai de 2023, puèi en junh, puèi en octobre. Fin finala (o  cal esperar ?) la ceremonia anonciada pel 19,  foguèt reportada en causa de l’atemptat al licèu d’Arras. Cerièra sul aquel pastís : la placa de marme bèla que deviá desvelar lo President, la calguèt escampar per n’engravar una autra amb la data novèla.

D’aquel temps, sèm a nos laguiar per aver de qué faire viure las lengas de França,  part del patrimòni  nacional.

Las chifras , somas e datas, son balhadas  pel Canard Enchaîné del 8 /11 / 2023

Albèrt d’Erau