Visca la diversitat!

Ven de paréisser lo libre « La diversité pour survivre … au réchauffement climatique et au refroidissement culturel » de Dàvid Grosclaude, a las edicions de l’ADEO (Associacion pel Desvolopament de l’Escrit Occitan). Lo libre de 244 paginas es prefaciat per Christian Guyonvar’ch, conselhièr regional de Bretanha.

Dàvid Grosclaude foguèt president de l’Institut d’Estudis Occitans; coma jornalista, publiquèt lo setmanièr occitan La Setmana e la revista pels dròlles Plumalhon; faguèt un mandat de conselhièr regional dins la Region Aquitània.

Dins aqueste obratge, l’autor tòrna sus la connexion evidenta entre biodiversitat e diversitat culturala pel biais d’experiéncias e de reflexions personalas, de tèxtes de l’UNESCO o encara d’òbras menadas per maites antropològues e autres cercaires coma Louis-Jean Calvet e Claude Lévy-Straus .

Al rescalfament climatic que menaça globalement l’umanitat, Dàvid Grosclaude ajusta lo «refrejament cultural» que menaça la mosaïca culturala mondiala pel biais de l’uniformizacion de las lengas e de las culturas. S’apièja sus d’exemples del monde tot, sus l’istòria d’Euròpa e especialament sus l’exemple de França, que se ditz prèsta a batalhar per la diversitat culturala d’en pertot dins lo monde mas qu’es reborsièra a respectar aquela quita diversitat sus son pròpre territòri. Las lengas e culturas (ditas) regionalas ne fan los fraisses dempuèi de sègles: coma occitans, sèm plan plaçats per ba constatar.

Lo nòstre monde, que vòl venir al secors dels pòbles dits «autoctòns», seriá pas a tornar inventar une forma de colonialisme e, aquò, al nom de la luta contra lo rescalfament climatic? Se pòt salvar la diversitat biologica sens servar las divèrsas lengas e culturas que son tantas visions divèrsas del monde e de l’avenidor?

La diversitat culturala e linguistica es una granda sèrva de concèpts, d’idèias, de vision del monde e de capacitats d’imaginar l’avenidor de mai d’un biais. Es mai que temps de reparar los degalhs faits sus Tèrra… segur que plan de camin demòra de faire. Alara, d’en primièr: legissètz aqueste libre!

E podètz tanben convidar l’autor per ne parlar dins vòstra associacion, mediatèca,…

Un qu’a pas comprés

Un qu’a pas comprés la question de las lengas e que torna sortir de l’oblit es l’ancian ministre francés de l’Educacion, lo Joan-Miquèl Blanquer, que se sap la luta que menèt contra lo vòte de la Lei Molac. Sembla aver doblidat que la possibilitat del desvolopament de l’ensenhament immlersiu se trapava dins aqueste tèxte.

Lo vaquí que se met a publicar tribuna e escriure sus sos rasals socials que « dins l’indiferéncia generala, dempuèi la dintrada passada, son estadas autorizadas en Corsega las « escòlas immersivas »(es el que bota las verguetas), valent-a-dire las escòlas ont se parla pas lo francés. » Declaracion que mòstra qu’a res comprés (e que, de tot biais, vòl pas comprene) la tòca de las escòlas immersivas qu’es de menar a la coneissença conjunta de la lenga minorizada e del francés !

Coma aquesta declaracion sufís pas, signa una tribuna dins lo Figarò amb lo constitucionalista Benjamin Morel (un autre que pòrta pas tanpauc las lengas dins son còr) per dire que lo sistèma es « illegal e inconstitucional » e que pòrta en el los « ferments del separatisma ». Aquò empacha pas lo Blanquer de se proclamar desfensor de las lengas regionalas. Coma devèm èsser mai piòts que los piòts (e sens faire de discriminacion cap als piòts), nos en èrem pas avisats!

E tanben…

• Una peticion en linha: Los servicis de l’Educacion nacionala d’Òlt an anonciat la supression d’un pòste d’ensenhaire dins l’esc`òla mairala bilenga Clément Brouqui de Gramat dins l’encastre de la carta escolara de 2026. L’an passat ja, se suprimiguèt la filièra bilenga a Assièr. Aquelas mesuras fragilizan l’ensenhament bilenga e sa perseguida sul territòri. Pichon a pichon, las avançadas se fan rosegar.

Una peticion es en linha que sètz convidat de signar al mai lèu. 

• En basc: Lo lehendakari (president de la comunautat autonòma d’Euskadi) Imanol Pradales rendiá vesita lo dijòus 2 d’abril al Senat francés  . Prononcièt un discors tot en euskara per revendidar l’oficialitat de la lenga basca en Euròpa e demandar per aquò faire lo sosten de l’Estat francés. Sabi pas cossí se ditz en basc: se faire d’illusions…

• Autoctònes: Mai de 476 milions d’autoctònes vivon dins mai de 90 païses pel monde. Constituisson pòbles d’una extraordinària diversitat: son los melhors gardians d‘unes sites dels mai rics en biodiversitat del planèta. Mas se fan raubar las tèrras e las ressorças, se trapan fàcia al racisme e a una violéncia tarribla quand resistan per defendre lors territòris. Plegaràn pas! Per ne saber mai, de veire e escotar mercé a Survival International : https://www.survivalinternational.fr/voix-autochtones?

Diversificat Roch

• Sus la cobèrta del libre del David Grosclaude, lo mot Diversitat es escrit en 53 lengas… De segur, i aviá pas la plaça per l’escriure dins los milierats de lengas en usatge sus Tèrra!