Tornem-lor la vergonha !

Diga ! L’avètz pas recebut, lo convit ? Vos o dise de memòria. Se presentava antau :

Castelet dau Pavilhon dels estanhs dau bòsc de Bolonha – París XVIⁿ

Dimècres 8 d’octòbre de 2025

Na Carla Bruni-Despenja-figas                    En Micolau-lo-Pichon

Dònas, sénhers, amics de la drecha, de l’esquèrra e dau centre (penitenciari !)

Abans la mesa a l’ombra oficiala de Micolau e son despart en retirada susvelhada, serián aüroses de vos reçaupre per un pòt de partença en preson.

• Còdi vestimentari : Tenguda raiada desirada, Rolex e braçalets electronics sovetats
• Animacion musicala : DJBalkani (jos condicionala)
• Tombòla : Primièr prèmi una dimenjada a Fleury-Merogís

Mercé de se marcar e de sonar au pus lèu abans confiscacion dels telefonets.

Bon, vos l’acòrde, l’ai un pauc quichat lo convit que val mai ne rire. Mas ne sèm aquí, ne sèm aquí ! Un ancian president de la Republica que paga la tornada generala abans que d’èsser engabiat recampant a son entorn tot lo grum gròs de sos amics e degun que se n’estona pas. Sens vergonha ! Los viatges en avion privat dels unes, los fraisses de boca, de taulejadas somptuosas o de vestits dels autres, las envolopas de bilhetas plen las pòchas, l’avion classa afar per lo costuma de recambi dau President, las belaròias d’una ministra de la cultura mesa en examèn de longa mas irremplaçabla, las escotas telefonicas, la somission quimica entre « collègas » per assadolar d’unas pulsions sexualas, un ministre de las finanças amb un compte en Soissa e ne passe, ne passe…

Sens te parlar de la cadièira a 40000,00€ per un president dau Senat dau tafanari bèl coma la pòrta d’Ais mas un pauc tròp sensible, pecaidonet…

E puòi LobanuT que sortiguèt dignament per la pòrta. Ère content per el, francament. Anava poder acabar sos estudis e aver un diploma vertadièr sens nos ficar de messorgassas mas lo tipe se’n  tòrna per la fenèstra amb LobanuD : cocarda blava-blanca-roja e los aglands a cada bana. Ollè !

Mas, fin finala, sèm nautres los cocuts.

Vòls que te diga ? E son aqueste mond sens ges de vergonha que daissèron acreire a nòstres ancians qu’emplegavan un patés immonde, una jos lenga lor encloscant la vergonha alara que parlava la lenga que donèt sas letraduras bèlas a Euròpa.

Vergonha de vergonha, saique la lor tornarem la vergonha !

Enfin, es çò que ne dise ieu…

La guinhada de l’IEO34. E, rau !  

Vos agradèt aquela bilheta?

N’auretz aquí un pauc mai amb La Gèsta dau Montamametas. En venda dins totas las bonas librariás.