LA PARET

Diga ! Ai lo vesin qu’es a montar, dapasset, plan planet, una paret entre son terren e los olivièrs que plantère, de verdalas, dins çò que disèm lo Camp de Baset. Lo vesin es pas un golamàs, plan lo contrari. Te fa lo mur en pèiras secas, frejas. Las causís menimosament, las espepissa, sospesa, de còps las ajusta d’un pichon còp sec de sa piqueta abans que de las pausar onte cau : « cunhadas per totjorn » çò ditz. Ges de laguis doncas. Dins 50 ans los pichons filhs esperituals de Georges Souche -oliu de ton grand, amorièr de ton paire, figuièira de tu !- poiràn venir faire fòtos polidas polidas dels olivièrs davant la paret sens far tombar de vergonha son mentòr.

• - Òu ! que me faguèt l’autre ièr, te’n fagues pas, l’acabarai un jorn la paret… Cau lo temps au temps.
• - Solide, la maire dels jorns es pas mòrta e i a pas lo fuòc a la mar !

E puòi per galejar :

• - È ! t’enganes pas ! bastís-la onte cau ta paret, fai pas coma los emplegats de la comuna de Carcassona que murèron la marrida pòrta d’un esquat e que puòi la deguèron desrocar la quítia nuòch que lo proprietari de l’ostau repoteguèt !

Vòls que te diga ? O avètz vista aquela ? Te desbarcan, los dau comando anti-esquat, sens res demandar a degun te construson un mur en cairon davant la pòrta jos las fòtos dels jonalistas tot s’enganant d’adreiça ! E passa que t’ai vist. Aquela empega ! Per una cagada aquò n’es una de cagadassa ! Cau creire que nasquèron un jorn que la luna èra pallòta o que se’n tornavan de la solenca de fin de vendémias a Limós après aver quichat sus la Blanqueta ! Per benastre son pas eles qu’emparedèron un còp èra la Piucèla dau Lengadòc, la plan escaisnomada ciutat de Carcasona que non jamai siaguèt presa ! Amb de gacha-empega antau, probable qu’i auriá daissada sa virginitat…

E puòi, dins los temps que sèm, de parets n’avèm pro. O disèm de longa que volèm de ponts ! Mas, per èsser onèste, crente qu’amb d’arlèris d’aquela mena siaguèssem pas prèstes de sortir dau tunèu… Negre, negre.

Enfin, es çò que ne dise ieu…

La guinhada de l’IEO34. E, rau !  

Vos agradèt aquela bilheta?

N'auretz aquí un pauc mai amb La Gèsta dau Montamametas. En venda dins totas las bonas librariás.