Diga ! Venguèssetz au vilatge que seriatz espantats de son sosdesvolopament. Ges d’autorota o de periferic, ges d’alèa, de passejada nimai de baloard, pas qu’una grand carrièira pas tan granda e un pont. E un fum de carrieròtas, de traversetas, d’andronas que s’encagaraulan a l’entorn dau puòg e de la glèisa vièlha.

Ennaut la plaça, coma pertot aicí, un banc, au canhard : lo Senat, lo Cenacle, lo cafè de l’escupinha que trabalha en collaboracion estrecha amb ràdio Platana. D’unes li dison tanben lo banc de corta vida que sos abituats tuan aquí lo pauc de temps que lor demòra.

E, a costat, la sola avenguda de la ciutat, bèla, grandarassa, emplatanada mas qu’es pas qu’una clausuga que mena sonque au cementèri… E, pardinas, los vièlhs l’an sonada l’avenguda de l’Egalitat.

Solament a l’ora d’ara, emai dins la mòrt, d’egalitat n’i a pas pus. Me contèron, los de la cambra nauta, un temps que los rics se pagavan un enterrament dich de « primièra classa » amb tapís roge, cortinas de velós que penjavan, un fum de ciris per un fum de fums, encensièr bèl, quadruple brand de campanas, atelatge princièr per lo carri dels mòrts… Per la paurilha, solide, i aviá pas tot aquel decorum e èra lèu estamat que lo mond cantavan :

«  Lèu, lèu, afanem-nos,

Lo pauròt a ges de sòu. »

Vòls que te diga ? E ben i tornam. Ara la Sacem te vòl faire pagar dreches d’autor per la musica de tas enterralhas. Los richasses partiràn en fanfara, e per tus, los amics poiràn pas solament bramar un darrièr « Se canta » sens riscar de pagar una fortuna als eretièrs dau Gaston Fèbus.[1] Vos conselhe doncas, per vòstra darrièira programacion musicala, de ben causir a quals anarà vòstre argent. La nuòch dels àngels dau Golamàs’K o lo portulan de Mauresca, dins la Montanha me’n vau, me semblan de circonstàncias.

Enfin, es çò que ne dise ieu…

La guinhada de l’IEO34. E, rau !  

[1] Caudriá encara que capitèsson de provar qu’es son papeta rance qu’escriguèt la sansonha !

Vos agradèt aquela bilheta?

N’auretz aquí un pauc mai amb La Gèsta dau Montamametas. En venda dins totas las bonas librariás.