Son bauges aqueles Eslovaques ?

Diga ! Ai lo conhat que ten pas en plaça, corrís de longa per pas res. Lo te vegère l’autre jorn qu’anava quèrre de qué se caufar sus lo lenhièr davant son ostau. Corrissiá darrièr la bariòta ! Li faguère remarcar que la carriòla l’esperariá, que capitariá pas de li passar davant e li demandère s’èra preissat. Solament pas, es son biais de viure. Me demande se pren lo temps de tombar las cauças quand va als comuns…

Seriá malaürós coma las pèiras en Eslovaquia que venon de limitar la velocitat per los pedons a 6 quilomètres per ora sus los trepadors de Bratislava. Après aver forabandit de l’espaci public trotinetas, patins de rotletas e l’eskateboard que mamet me crompèt en 1979, après aver impausat cascos per los bicicletaires dels pompilhs naturals o dopats a l’electricitat, lo legislator desobrat eslovac se’n pren ara a aqueles que causisson la veitura de Monsur Solièr per sos desplaçaments dau cada jorn.

Siaguèssetz, aval, dins una « Zòna Slow Walk », aquò lor sembla petar melhor en anglés mas es una ZAPP, Zòna d’Anar Plan Planet, e passèssetz subre los sièis km/h seretz verbalizats per « excès de dinamisme podometric » e prendretz una multa d’un centenat d’èuros, pas qu’aquò. Saique de policièrs « agents de caminada » se vendràn metre a ton pas -un-dos, un-dos- per contrarotlar ta velocitat sus un podomètre radar embarcat. Benlèu te van levar los ponches dau permés de caminar e te caudrà far d’estagis de reeducacion e pagar lo  prètz fòrt per recuperar lo drech de marchar. Amb en prima  encloscatge d’eslogans dau tipe : «  Per vòstre securitat, pensatz a landrejar ! » o lo famós « Ralentir es un dever civic ! »

Vòls que te diga ? Aquò poiriá far sorrire, i agèsse pas un fons de bon sens  a voler levar lo pè dins un mond que corrís a sa pèrda, a tota bomba. I a pasmens quicòm que truca dins la decision dels eslovaques e qu’enfecta lo reborsièr de la plena pèl que siái ieu. Quand, coma bon nombre d’occitans, ta vida es reglada sus lo sol « Article nòu, cadun fa çò que vòu ! »  son pas de bon sofrir totas aquelas interdiccions.

Enfin, es çò que ne dise ieu…

La guinhada de l’IEO34. E, rau !  

Picatz sus l’image, i tombaretz !

Vos agradèt aquela bilheta?

N’auretz aquí un pauc mai amb La Gèsta dau Montamametas. En venda dins totas las bonas librariás.