Vestit fa pas monge

Diga ! « Vestit fa pas monge, ni amulça canonge ! » Avisa ! ara los còlblancs se vestisson d’un blau de trabalh per anar au burèu e afortir fòrt e mòrt que eles trabalhan ! Dison aquò la « gentrificacion » vestimentària… Bon, vos rassegure sulpic, se cargan pas la salopeta dau papeta crompada sus la plaça, au camion, sas aquela que s’estrechís a la bugada quand la fas bolhir e que te remonta leis alibòfis a la plaça de las galhas quand lèvas lo braç un pauc naut. Non, lor cau la combinason nauta cordura, made in París, a 250,00€. Sabe pas se capbordejan dusca a se perfumar a la susor dau front dels autres ?… Rai dau patiment e de las enduras d’aqueles paures bogres que cargavan lo blau per se ganhar a pro pena lo de qué dau cada jorn qu’ara la mòda fòrça l’admiracion de totes sus aqueles vilandreses trentenaris que teletrabalhan dins la creacion, plan planet, lo mai sovent.

Aqueste biais de desgaunhar los vestits dau vesin es pas de uòi. Au nòstre siaguèron primièr los caçaires que se vestiguèron en Rambos de las Fòrças Especialas totas armadas confondudas. Mas coma se tiravan dessús coma de lapins, se carguèron puòi lo gilet irange,

-camoflatge que cau pas colhonar !- que ne faguèt de còps lo braç armat d’aqueles fraires engiletats que flanquèron la jaunissa a Macron en 2018. Mas coma contunhan de se desquilhar los uns los autres, crese que van passar au gilet paraballas dau GIGN e aurem lèu de Robocòps tot plen la garriga per menar operacions de polícia contra los singlars.

Vòls que te diga ? De monges, n’i a pas gaire e de canonges n’i a pas pus. Se ditz tanben :  « Non son païsans totes los que pòrtan l’agulhada ». Levat dins de retrospectivas agricòlas, fa un brave moment que n’ai pas vist de coma aquò, de païsans. Lo mond càmbia, benlèu que devèm despolsar nòstres reprovèrbis ?

Enfin, es çò que ne dise ieu …

Vos agradèt aquela bilheta?

N’auretz aquí un pauc mai amb La Gèsta dau Montamametas. En venda dins totas las bonas librariás.