Nipon ni marrit

Diga ! Per qual espincha l’anament dau mond en cèrca de despaïsament Japon es lo país de bavarilhas e avèm d’apréner fòrça de sas gents e de sa cultura. Nòstres joves s’i enganan pas que badan totes la cultura de l’Empèri dau solelh levant, pantaisan de gèissas en quimònos, « ensushisson » sas siètas e « emmanganan » sas bibliotècas. I van totes coma cabras a la sal.

E, per qual cèrca subjècte d’inspiracion per sa paura guinhada setmanièira, lo temps de daissar polsar caçaires ricardopitècas o vilandreses escrologistas, butar los campairòls e bolhir lo vin de Dieu dins la tina, Japon es pas mal tanpauc.

Evoquère ja aquí d’unas practicas curiosas plan popularas aval coma la sologamia -lo maridatge amb se-meteis, las escòlas dau sorrire o la campanha publicitària « Saqué Viva » dau govèrn per encoratjar los joves a beure e sauvar son economia a còp de taxas sus l’alcoòl. S’ère pas tan cuolcosit auriái pogut parlar atanben dels comuns lavants-desinfectants-secants-esterilisants amb secatge e coifatge de las partidas intimas pas que per se cambiar dau cagador de la Tanta Nina au fons de l’òrt e dau fuòlh dau Midi Libre copat en uòch.

Vòls que te diga ? Çò que me mena uòi es una autra practica japonesa quauques pauc espantanta per nautres. Aval los ancians fòrça nombroses que, en causa d’una retirada tras que magotisna, an pas la moneda per se pagar lo moritòri medicalizat per lo vielhum, cometon delictes menuts per anar caudets e noirits, tranquillons tranquillets, acabar sa vida en preson. E quand sortisson recidivan istòria d’ i tornar…

Poiriam benlèu demandar als joines européencs que badan de tròp e sens far la part de las causas Japon s’an enveja d’acabar sa vida a las Baumetas quichats coma d’arrencadas ?

Enfin, es çò que ne dise ieu…

La guinhada de l’IEO34. E, rau !  

Vos agradèt aquela bilheta?

N’auretz aquí un pauc mai amb La Gèsta dau Montamametas. En venda dins totas las bonas librariás.