Cranes amics,

quauques nòvas d’Erau au lindau d’aqueste estiu que vos desiram dels bèlses per tornar préner fòrças e vam per la seguida que, coma o sabètz, es pas que la debuta!

D’en primièr, coma se vei sus l’illustracion, la Botiga de Besièrs es barrada per l’estiu mas la Botiga virtuala demorarà dobèrta, de jorn coma de nuòch, e pas que per vautres (e tanben per lo sorrire de la postièira) anirai de temps en quora a la Pòsta per vos mandar bona literatura e libres novèls. (de veire un pauc pus bas)

Los cercles e presidents d’assos van recebre tanben lo formulari costumièr per saupre vòstras espèras quant au sosten que vos podèm portar per vòstres corses e animacions de venir e nos organizar.

Lo CA de l’IEO34 s’acamparà debuta de setembre per decidir de qué ne virarà.

Una data tras qu’importanta de reténer:

lo dimenge 24 de setembre

nos recamparem a Lodeva per l’AG de la seccion departamentala.

Es lo fabulós cercle dau lodevés qu’Occitania la granda nos enveja que se vei confiar l’AG d’aqueste an e que nos va engimbrar aquò amb lo mestritge que li conoissèm. (Mercejam fòrça aqueles que respondèron a la crida que faguèrem, an que de pacientar un pauqueton e anarem tanben en cò sieu. Nos semblèt, per maitas rasons, qu’èra pas ininteressant de se pausar ongan dins la ciutat de las Frocandonas e dels Frocandons.)

LIBRES NOVÈLS

Lo trabalh menat au long de l’annada es a s’acabar e la rintrada serà literària o serà pas.

Totes aqueles libres son imprimits a Nimes. D’unes seguiràn après vendémias, entre autres un libre de contes de Coleta Derdevet Meneau e un estudi jot la direccion d’Eliana Gauzit-Bec sus lo poèta de Lodeva Prospèr Gèlis

Amigas e amics legeires despacients, pensatz d’agachar lo site de temps en quora. Tre recepcion dels libres que son per ara a l’impression, seràn meses en venda aquí sus lo site => BOTIGA

Ja sortit e en venda. Una traduccion remirabla dau Miquèl Pedussaud

Luigi Pirandello (Agrigente 1867 – Roma 1936) es un autor italian, poèta, romancièr. Son libre Novelle per un anno ten una plaça centrala dins son òbra. Faguèt l’escomesa d’escriure gaireben un conte per cada jorn de l’annada.

Aquelas novèlas dison la realitat de la societat siciliana de son epòca : una societat en buta a de dificultats grandas mas ont l’escriveire fa sovent puntejar un trait umoristic. I a tanben de retraits pastats d’umanitat que tòcan a l’universalitat.

Las descripcions son d’una precision remirabla e l’escritura d’una finesa bèla.

Aquí un ramelet de contes causits qu’ensaja de balhar una idèa d’aquela votz enfachinanta.

Pròsa, novèlas, Lengadocian, 15X21, 196 paginas, 16€

Lo cap d’òbra de Joan Loís Segondy e dels Tegalós. (en fin d’impression au jorn d’uòi)

Lo trabalh de collectatge d’una vida, mes en òbra pendent 10 ans per lo cercle dau Clarmontés. E mai d’una annada de trabalh d’infografia de la talentuosa e pacienta Elodia Saulnier de l’IEO OPM.

592 paginas de sabentitge, 285 ficas per dire los aucèls d’aquí en lenga nòstra amb resumit en francés, un fum de fòtos, mimologismes, fabiòlas d’Esòp tradusidas dau grèc per Joan Pau Bringuièr e una polida cobèrta cartonada.

Colleccion Natura, Lengadocian amb resumits en francés, 14,5X22,5, cobèrta cartonada, 592 paginas, 40€

Un roman complètament baug dau Cristian Chaumont. En cors de liurason.

Assaber, a las legeiras, als legeires e als autres.

Amb aqueste roman futurista vos anatz retrobar lèu fach dintre la clòsca de mantun personatge, d’en primièr de dos gorillas (mascle e feme)  « geneticamanent modificats » per l’intervencion del famós neurològue tolosan, somitat de la medecina, Kasimir Patatszczywski (se pronóncia exactament coma s’escriu)…  e tanben de qualques autres qu’eles tanben avián res demandat.

Aquesta istòria entortobilhada a plaser nos resèrva, camin fasent per carrièras, plaças e monuments de Tolosa, plan d’autras suspresas e un suspense de los que vos daissan sanglaçat. Anatz crosar dins aquesta aventura que cambadeja alegrament entre sciéncia e politica-ficcion, una enquèsta policièra sus una sècta de dangieroses complotaires eles tanben entre las mans d’una sècta bailejada pel rival (maquiavelic) del brave professor…

Pròsa, roman, Lengadocian, 15X21, 180 paginas, 15€

L’esperàvetz? L’avèm fach. Un recuèlh bilingüe de las cronicas de l’Ivona de Mèsa, publicadas setmana a cha setmana sus lo blòg de l’IEO. Serà imprimit dins l’estiu.

« Ivona obsèrva lo mond a l’espèra de l’eveniment. Son inspiracion es sens bòlas que se va noirir de l’actualitat, d’anecdòtas, d’articles scientifics coma d’istorietas de uèi o dau passat, de la vida vidanta fin finala. Fina cosinièra, dins sas recèptas coma dins sos escriches, sap ajustar la punta de sal que dona de gost o apondre los qualques grans de pebre que fan ressortir sa composicion mas tanben lo vinagre quand li sembla necite e que las circonstàncias ne fan mestièr ».

Pròsa, cronicas, bilingüe lengadocian francés, 15X21, 384 paginas