L’uòlh del buòu

« Ivona obsèrva lo mond a l’espèra de l’eveniment. Son inspiracion es sens bòlas que se va noirir de l’actualitat, d’anecdòtas, d’articles scientifics coma d’istorietas de uèi o dau passat, de la vida vidanta fin finala. Fina cosinièra, dins sas recèptas coma dins sos escriches, sap ajustar la punta de sal que dona de gost o apondre los qualques grans de pebre que fan ressortir sa composicion mas tanben lo vinagre quand li sembla necite e que las circonstàncias ne fan mestièr ».

Aqueste libre recampa, de passejadas en soscadissas au fial de l’aiga, de cronicas que la primièra espeliguèt dins lo temps de la covid. Volgut bilingüe per fissar la curiositat dels novèls estatjants aculhits en riba de Taur ; mas tanben per tornar donar lo chuc e lo muc de sa lenga a aqueles d’aquí.

Ivona Beaume nasquèt lo 29 d’abril de 1941 a Mèsa, en ribas de l’estanh de Taur, e i foguèt noirida tre l’enfància de bona lenga d’òc. Après un eclipsi professional longàs, l’estanh e lo temps retrobats daissèron una placeta a l’enveja de tornar trapar la lenga nòstra, a l’oral bèl primièr. Còp d’astre ! Un dels nombroses cercles d’Erau l’aculhiguèt braces dobèrts, aquí dins son quite vilatge.

Mas lèu-lèu, la panta de daissar un quicomet d’escrich dins aquela lenga se faguèt sentir, e tot èra a apréner… Calguèt qualques annadas. Mas, aicí sèm.